السياحة نار والأوتيلات مفوّلين

كتبت جوزفين حبشي في “المسيرة” – العدد 1730

– وبلبس فستاني الأحمر ولّا فستاني الأخضر، بو توفيق عازمني عَ تركيا، دلِّينا وين منسهر، بوروم بوم بوم  بوم…

ـ وطِّي صوتك طوشتيني، شو مفكرة حالك طروب؟ بعدين مش شايفتيني عم بحضر «بو ملحم» على تلفزيون لبنان؟

ـ بلا ملحم بلا بلوط، هلّأ مش وقت مسلسلات. شفلي هالفستان الأحمر الجديد. منصّحني شي؟

ـ يه يه يه، شارية فستان أحمر يا إم توفيق؟؟؟؟ يقطع عمرك قطع يا زوهايمر، المرا مفكرة حالها بالطَّعش. بعد ناقص تصبغي شعرك وتتصوّري سلفي، وتنزّْلي صورك عالفوسبوك. يا جرصتنا بين الجيران. يا جرصتنا من جهلة السبعين.

ـ أول شي، أنا عمري ستين. وتاني شي، اللّي عم يلبسوا أحمر ويتصوّروا مش أحسن منّي. على كل حال هيدا الفستان لتركيا مش لهون، و»بوروم بوم بوم ، بو توفيق عازمني على بودروم».

ـ أنا عازمك على بودروم؟

ـ أكيد. جارتنا سهيلة مسافرة جمعة على تركيا. اصطفل، أنا كمان بدِّي روح.

ـ لوين يا إم توفيق ع مهلك؟ لمين تاركة أرضك وأهلك؟

ـ كلّن أسبوع. بدي أعمل سياحة وجدِّد شبابي، وإشتري كم فستان أحمر متل فساتين جوليا.

ـ مين جوليا؟ مرتو لبو صعب؟

ـ ولو يا بو توفيق، نسيت جوليا؟ ما في غيرا، بطلة «مرارة الحب».

ـ دخيلكن رح تفقع مرارتي. ولِك سياحة شوووو؟ بدك تروحي عالحجّْ والناس راجعين؟ ما لبنان هالصيفية مليان سوّاح، والأوتيلات مفوّلين. ما سمعتي شو قالوا ع التلفزيون تخمين؟ عيب يا إم توفيق، وين حسن الضيافة؟

ـ بدِّي سافر يعني بدِّي سافر. أنا «مدبرسي» وبدِّي غيّر جو.

ـ روقي يا إم توفيق، وصدقيني هلأ بلّش التغيير. الجو إيجابي، والكل بيحبّوا بعضن، والبلد راجع بلد سياحي، وكلنا رح نغرق  قريبا بالبحبوحة ونعوووم.

ـ قلتلي رح منعوم؟ ما ربحنا من السياحة، رح نحط أكتر منو حق فيول وبنزين، لنشعشعلُن الأوتيلات للمغتربين. هيدي عيشة هيدي؟

ـ مش مهم، المهم الخطة الاقتصادية نجحت، ولبنان راجع راجع يتعمّر راجع لبنان، بفضل دولارات السوَّاح المبسوطين، لأنهم رح يعيشوا بأنجأ 100 دولار، أسبوعين تلاتي متل السلاطين.

ـ ما بفهم، أنا كمان بدِّي سافر على تركيا وزور قصر السلطانة «هويام». وأوعى تسألني مين «هويام»، هيدي اللي كانت تعجبك بمسلسل «حريم السلطان» يا بو جهلة السبعين. بوروم بوم بوم بوم…

للإشتراك في “المسيرة” Online:

http://www.almassira.com/subscription/signup/index

from Australia: 0415311113 or: [email protected]​​​​​​​​​​

المصدر:
المسيرة

خبر عاجل