إعلان هام… للجادين فقط

كتبت جوزفين حبشي في “المسيرة” – العدد 1732

– إم توفيق: يلا، شهّل يا بو توفيق، وصل توفيق جونيور وهلأ هو بيوصلنا.

– توفيق جونيور: خير يا تيتا؟ لوين؟

– إم توفيق: ليك يا رجوتي، بدك تنزّلنا على بيروت، بدنا نحط إعلان بالجريدة.

– توفيق جونيور: ليش مين بعد بيقرا جريدة يا تيتا؟ هلأ عصر الأونلاين.

– بو توفيق: عصر شو؟ ليك يا جدي، نحنا معصورين خلقة، لهيك بدك تنزّلنا على بيروت لنحط إعلان بالجريدة.

– توفيق جونيور: ما في داعي ننزل على بيروت. منحط الإعلان هلأ بهاللحظة، ومن هون، من السطيحة تحت العريشة. هيدا هو عصر الأونلاين. لحظة لإفتح فيسبوك…. يلا، قولولي، شو بيقول الإعلان؟

– بو توفيق: كتوب عندك يا جدي كتوب. للجادين فقط، مطلوب شبّ طويل القامة، عريض المنكبين، مفتول العضلات، رقم إجرو “ماناموم” 46.

– توفيق جونيور مبتسمًا: وشواربو بيوقف عليهن النسر؟ ما تكون عم بتدوّر على عريس شبوبية لستي يا جدي؟

– إم توفيق: فشررررر…. جدك ما ببدلو، لا برامبو ولا بروكي ولا حتى بجبران باسيل.”ماناموم” الجنرال فقط لا غير.

– بو توفيق بفرح: أصيلة يا إم توفيق. كتوب يا جدي كتوب، مطلوب شب قبضاي متل رامبو وروكي، لإنجاز مهمة بدها شجاعة وقوة ومخاطرة. والأجر: 10 بالمية من الأرباح.

– أم توفيق تفنجر عينيّها: ليش 10 بالمية؟؟؟ بزيادة 5 بالمية. ما هني أنجأ يطلعوا ملاليم.

– توفيق جونيور: يا عمي فهموني عن شو عم تحكوا؟ رامبو وروكي وطوم كروز وmission impossible؟ شو في؟؟؟؟؟

– إم توفيق: مين هيدا طوم كيروز؟ أكيد قواتجي ومن بشري. شفلنا غيرو، صحيح القوات قبضايات، بس ما بدنا يساعدونا بشي. أصلاً هني ما بقى يقبلوا يحطوا إيدن تحت بلاطتنا.

– توفيق جونيور: كروز يا ستي كروز، هيدا أهم ممثل بهوليوود بأميركا. حاصلو، ليش بدكن رامبو وروكي؟ ما تكونوا ناويين تصوّروا فيلم أكشن عنا هون بالضيعة؟

ـ إم توفيق: لأ، بدنا حدا يروح عالبنك، ويسرقلنا مصرياتنا، اللي سرقهن منّا البنك.

– توفيق جونيور: شووووو؟ عم تحكوا جدّ أو مزح؟

– بو توفيق: أكيد عن جد. وحط عندك بالخط العريض إنو الأجر 10 بالمية من كل شي ممكن يسحبو.

– إم توفيق: لأ، حط 5 بس، إنو بزيادة عرقبتو. أو  بقلك شو؟ حط الأجر 2 بالمية  بس، إنو البنك بيسرقنا، واللي بدو يسرق البنك كمان بدو يسرقنا؟

– بو توفيق: يا إم توفيق، العملية فيها مخاطرة ولازم نشجعو.

– إم توفيق: مخاطرة شو؟؟؟؟ بالعكس، من بعد هالعملية، هوي رح ينشهر ويصير بطل، ورح يستقبلو عبدو الحلو عتلفزيون الـ OTV ، ومش بعيدة صاحبك إبن كيروز يطلب وراه على “هاليوود” بأميركا.

 

للإشتراك في “المسيرة” Online:

http://www.almassira.com/subscription/signup/index

from Australia: 0415311113 or: [email protected]​​​​​​​​​​​​​

المصدر:
المسيرة

خبر عاجل