كتبت جوزفين حبشي في “المسيرة” – العدد 1734
إنسى؟ كيف؟ إيه كيف؟ نوّرني إذا بتريد. كيف ممكن إنسى وجع عمرو سنين، وكل مالو عم يقوى ويزيد؟ كيف ممكن إنسى أحلام تبخرت ومستقبل طار وأطفال ماتوا لحتى كراسيكن تبقى وثرواتكن تزيد؟ بدك تسمحلي يا عهد، إنت ما بتمون، وموت الأمل اللي ما بيتعوّض، ما كان يمكن، لو ما إنت تكون.
إنسى؟ كيف ممكن إنسى 40 مليار دولار انصرفوا عالكهربا، منن 30 مليار بزمنك، وبقي حلم الـ24 على 24 عالوعد يا كمّون؟ بدّك تسمحلي يا عهد إنت ما بتمون، والمال المهول اللي انصرف عالنفط ودين الكهربا، ما كان يمكن، لو ما إنت تكون.
إنسى؟ كيف ممكن إنسى المليارات اللي كرجت كرجة ميّ، على محطات تكرير ميّ ما بتبل القلب، وسدود فاسدة، من قلبي قلتلا «درب تسدّ وما تردّ» ؟ كيف ممكن إنسى التوظيفات العشوائية والأموال المهدورة على عقود الخليوي ووزارة التربية ووزارة السياحة والسفر والكزدرة مع الوفود والحاشية، واستغلال أموال المغتربين بمؤتمرات تحوّلت حملات إنتخابية وتعيين قناصل فخريين هيك، متل جوائز ترضية لكل مين شافنا بعين؟ بدّك تسمحلي يا عهد بس أنا إلي عين قلّك إنت ما بتمون، إنت شمّيت هوا، والشعب اللبناني أكل هوا، وكل هالهدر لِ بلا نوا، ما كان يمكن، لو ما إنت تكون.
إنسى؟ كيف ممكن إنسى السياسة الحرتقجية الداخلية المثيرة للفتن، وعَ شوي للحرب بكل لبنان، والسياسة الخارجية الخارجة عن المعقول والمقبول، اللي دمّرت العلاقات مع اخوتنا العرب وجبرتن يسكروا بوجنا بواب ما بعمرا تسكّرت؟ لأ يا عهد مش بسيطة، ولا الحليف ولا الشقيقة ولا الصهر حدا منن بيمون، وكرمالن ممنوع نشرّع الحدود، ونكدّس نيترات الموت بمرفأ بيروت، ونطنّش عن التنبيهات، ونحاول متل العادة نلاقي كبش محرقة، ونجنّ ونشنّ حرب على شحن الدولارات، ليسيطر الحليف على شريان الأوكسيجين الوحيد الباقي للبنان. ممنوع يا عهد ممنوع، وكل هالتخبيص ما كان يمكن، لو ما إنت تكون.
لأ يا عهد إنت ما بتمون، ولا أنا ولا غيّري رح ننسى الحلم اللي حلمناه، وصدقنا يمكن إنك رح تحققلنا ياه، فطلعت سلتنا فاضية، ومعاجن خبزنا فاضية، وأرصدتنا المصرفية فاضية، متل بطولاتك الخرافية وإنتصاراتك «الدونكيشوتية» وإصرارك إنك تنسّينا وتلهّينا وتذكّرنا بأمجاد وهميّة. لأ يا عهد إنت ما بتمون، وما فيك تلغي ذاكرتنا، ولا تمحي واقعنا ووجعنا وتعبنا وتقلو عمرك ما تكون. إسمحلي يا عهد ، كرمال لبنان فقط لا غير، ما رح ننسى نحنا مين، وبشو لازم نبقى متمسّكين، وبمين لازم نضلّ مآمنين، لنرجع نحنا وهالدولة نقوم. إسمحلي يا عهد، لبنان وحدو بيمون، وكرمالو وحدو ، نضالنا بيهون.
للإشتراك في “المسيرة” Online:
http://www.almassira.com/subscription/signup/index
from Australia: 0415311113 or: [email protected]