كتبت جوزفين حبشي في “المسيرة” – العدد 1735
– جدو بو توفيق، جدو بو توفيق، نحنا جيناااا.
– أهلا أهلا بهالطلة يا جدي. كيفكن يا ميشو وجبرانو؟ اشتقتلكن. كيفكن بالمدرسة؟ شاطرين؟
– شاطرين كتيييير يا جدو، ولهيك «بابا نويل» رح يجبلنا كل الهدايا اللي كتبناهن بهيدي الليستا.
– شو؟؟؟ هدايا شو اللي كاتبينن يا جدي؟
– هدايا للميلاد.
– أخ يا جدي أخ، لا بقى في هدايا ولا بقى في عيد. خلص، بح، ما بابا نويل الكِل فَلْ. لا بقى تسنّوا سنانكن على شي. قال هدايا قال؟ هدايا شو اللي طالبينن؟؟؟؟
– أنا يا جدو طالب سيارة بتمشي عاريموت كونترول وبتتشرّج عالكهربا.
– كهربا شو يا جبرانو؟؟؟؟ خلص، بح كهربا، بابا نويل الكِل اللي كان رح يجبلكن كهربا 24 على 24 خلص فَلْ. لا بقى تحلموا بكهربا.
– أنا يا جدو مش طالب سيارة عالكهربا. أنا طالب طيارة بتطير عالفيول.
– فيوووول شو يا ميشو؟؟؟؟ خلص، بح فيول، بابا نويل الكِل اللي حط الغار بالبحر وكان السبب بطلعتو، خلص فلْ. لا بقى تحلموا تشموا ريحتو للغاز. بح، راااح.
– يييي… طيب أنا طالب هدايا تانية، لعبة عسكر وحرب ومدافع وبواريد ودبابات.
– عسكر شوووو يا جدي؟؟؟ ما العسكر بح من زمااان، وبابا نويل الكِل اللي كان ناوي يطالب فيهن، خلص فَلْ. لا بقى تحلموا تشوفوا عسكر يا جدي. ولِك حتى الحرب والدبابات بح، بابا نويل الكِل اللي كان حامي حماة الوطن والحدود والسلاح، خلص فَلْ، لا بقى تحلموا تشوفوا حرب ودبابات وقنابل، خلص ما بقى يسترجوا يبيّنوهن، لأنو اللي كان حاميهن بح، رااااح.
– جدو بو توفيق، أنا ما بدي حرب ودبابات، أنا بدي بس بس فرد ميّ.
– فرد ميّ شوووو؟؟؟ ليش بعد في ميّ يا جدي؟ ما اللي كان ناوي يبني سدود ويغرّقنا بالميّ، خلص، بح، راااح.
ـ شو يعني؟؟؟؟ راح بابا نويل وراحوا الهدايا؟؟؟؟ ما في يبعتلنا حدا من الأقزام العايشين معو بالقطب الشمالي؟؟؟؟
– برافو عليكن يا جدي، هيدا الحكي المزبوط. يلّا خزقولي هالليستا، وانزلوا عالدكان اشتروا قنينة «سبراي»، واكتبوا على الحيطان عندكن بالحيّ: «بدنا بدل عن رايح».
– ما فينا نعمل هيك يا جدو، أهل الحيّ ما بيخلّونا.
للإشتراك في “المسيرة” Online:
http://www.almassira.com/subscription/signup/index
from Australia: 0415311113 or: [email protected]