باسيل: “بدّهم يجيبولنا رئيس جمهورية فاسد”

أعلن رئيس التيار الوطني الحر جبران باسيل أنه لدينا رؤية للبنان 2050 ورؤية للتيار في العام 2026 و2030 و2050 والتيار حرّ لأنّه يتنفس حريّة ولأنه حرّ بقراره ولا يتقيّد بسلطة ولا بتمويل.

وقال خلال الجمعية العمومية لقطاع الشباب في التيار في الربوة بحضور رئيس الجمهورية السابق ميشال عون، “الجنرال هو المدرسة، ونحنا جيله، وبدّنا نريّحه بأمور، بس بدّنا نتعبه بعد بتعليمنا وتثقيفنا ويعطينا وقته للشباب. هو قيمته كزعيم وقائد وملهم ومربّي ومعلّم اكتر بكتير من رئيس”.

وأضاف، “الحلم ببناء الدولة ما بيتحقّق بسرعة والاّ بيكون وهم وساعتها الوهم سمّ… اذا كان حدا توّهم انو بالرئاسة رح نحقّق كل اهدافنا، بيكون الوهم آخره غصّة! وهيدي الغصة يلّي صابت اللبنانيين، لأن افتكروا انو مع الرئيس عون كلّه بيظبط! ويمكن الحق شوي علينا، لأن البعض افتكر هيك.

وتابع، “نحنا ناس حلمنا ما بيوقف وما بيشيخ، وطالما عم نحلم، رح ننتصر وينتصر الخير على الشر، والاصلاح على الفساد وواحد متل رياض سلامة رح يتحاسب… واذا ما تحاسب واحد متله، ما بيقوم الوطن”.

وقال، “بدّهم يعملوا اصلاح، بس بدّهم يجتمعوا ويجيبولنا رئيس جمهورية فاسد، ورئيس حكومة فاسد وحاكم مركزي افسد منهم وبحمايتهم، وبيزعلوا اذا قلنا لا! لا ومئة لا! ما حدا يهدّدنا بالفوضى او بعقوبات، قديمة هيدي او بالفراغ وبالحكومة وبمجلس النواب”.

وعن التمديد للمدير العام للأمن العام اللواء عباس إبراهيم، قال، “إننا نرفض أي تمديد انتقائي لشخص أو لفئة من الناس ونحن مع تمديد جماعي ولم أطرح لحظة أي اسم بالمقابل أو أي مقايضة”.

وأردف، “نحنا تيار لأن ساكنين بوجدان الناس مش بس ببطاقاتهم، ومسنودين على تاريخ لبنان وجذورنا فيه، ومش بس على التنظيم الحزبي ونظامه يلّي منعدّله كل سنة ومنّا جامدين فيه. منحترمه ومنطبّقه متل ما هو، ولمّا يلزم منطوّره ليخدمنا احسن، مش بس لنخدمه”.

ولفت إلى أنه “منذ اليوم الأول بشكل واضح أننا لا نشارك بأي جلسة تشريع بظلّ غياب الرئيس إذا لم تكن بنودها بداعي القوة القاهرة أو مصلحة الدولة العليا أو لسبب ضروري واستثنائي وطارئ وكل ما قيل كذب”.