كتبت جوزفين حبشي في “المسيرة” – العدد 1737
– يا دلّي يا تعتيري.
ـ خير يا بو توفيق، مين عالتلفون؟
– يا دلّي يا تعتيري، مسؤول من جهة أمنية، وطلب مني شرّف إشرب معو فنجان قهوة. يا دلّي يا تعتيري، أنا ما عامل شي أبدا. قولك شو بدن مني يا إم توفيق؟
– شو بيعرفني شو بدن منك؟ شو قالولك عني بقرا بالفنجان؟
– طيب طبّي هالفنجان وشوفيلي، يمكن يبيّن معك شي بهالتفلات.
– تكرم عينك. هات لنشوف، طالعلك محبس بهالفنجان.
– يا دلّي يا تعتيري، محبس يعني حبس.
– محبس يعني خطبة وجازة يا بو توفيق. أنا بقول هالمسؤول سامع عن صيتك اللي متل المسك وحابب يصاهرك، ويطلب إيد بنتك لإبنو.
– يا دلّي عليكي يا إم توفيق، أنا أو انتي زوهايمر عالآخر؟ ليش نحنا عنا بنت للجازة؟
– لأ، بس يمكن هو ما بيعرف إنو نحنا ما عنا بنت.
– هيدي جهة أمنية يا إم توفيق، بيعرفوا كل كل كل شي. بحبشيلي بعد بهالفنجان.
– مبيّن كأنو في عندك تمثال سيدة حريصا السلام ع إسما بنص هالفنجان. الهيئة عندك ندر ما وفيتو؟
– لأ مش نادر ولا ندر. في رسومات بلدية حريصا مش مسددها بعد، بس شو خص البلدية بالجهة الأمنية؟ يا دلّي يا تعتيري شو بدن فيّي؟ ما يقوموا يتهموني بتفجير بور بيروت.
– أكيد لأ، صحيح عمرك 86 سنة، بس إنت «لم تكن تدري». وأصلاً ما حدا معبّرك وما حدا بيوصلّك تقارير.
– يا دلّي يا تعتيري، على شو بدّن يقرروني ويمضّوني، على شوووو؟
– حبيبي يا بو توفيق لا تخاف وشدّلي ركَبَك. الجهة الأمنية ما بحياتا بتخطط تركّب ملفات واتهامات لحدا، بدليل إنها عازمتك ع فنجان قهوة. القهوة يا بو توفيق بتخليك تركّز وما تخبّص بالحكي. شكور رّبك إنو الجهة الأمنية مش عازمتك ع… كاس ويسكي.
للإشتراك في “المسيرة” Online:
http://www.almassira.com/subscription/signup/index
from Australia: 0415311113 or: [email protected]