لبنان قبل الطشّ بالتعاسة

كتبت جوزفين حبشي في “المسيرة” – العدد 1739

– ليك، ليك هالحكي، قال لبنان قبل الطشّ بالتعاسة قال.

– شو في يا بو توفيق؟ ليش معصّب؟

– وكيف ما بدي عصِّب، وهالإعلام عنا متحطط عالبلد وعم بيسوِّدلو سمعتو. قال شو؟ هلأ ذاعوا عالتلفزيون إنو من أصل 137 بلد، طلعوا الأفغان أكتر شعب تعيس بالعالم، ونحنا وراهن عالدعسة. خدلِك بقى. وع فكرة، مش بس الإعلام متحطط ع لبنان، كمان بيت الرحبانة.

– لاااا، شكلو الزوهايمر ضارب طنابو معك. ولو يا بو توفيق!!! ما هو إذا في حدا رسملنا صورة حلوة عن لبنان الأخضر، هني الرحابنة.

– الجيل الجديد عاطل يا إم توفيق. ما سمعتي غسان شو غنّى سنة 1994؟ «اشتغل وما تقبض يا حبوب». يا عيب الشوم عليه، فَوَّل عالبلد .

– روق يا بو توفيق، هلأ بيشبق ضغطك، وبتروح فيها يا رجوتي، وبيزيدو عدد التعيسين بهالبلد واحد، وبدل ما نكون قبل الطشّين، منصير بالمركز الأول.

– يا إم توفيق إنتي اللي رح تجلطيني ع فكرة. عم قلّك الإعلام عم  يكذب، ونحنا مش طشيّن ولا قبل الطشّين حتى. هلأ صحيح في كتير من اللبنانيي زعلوا كتير واكتأبوا من بعد ما انتهى العهد، بس إنو معليش، نحنا مش أتعس شعب بالعالم من بعد أفغانستان. نحنا بألف خير ومنسوب السعادة عنا عالي .

– وكيف طلع معك هيك؟

– أول شي، في عنا 128 «سعادة» بمجلس النواب، صح؟

– صح.

– تاني شي، الاقتصاد والقانون هني أساس الدولة القوية والسعيدة، ما هيك؟

– هيك.

– طيّب، حاكم مصرف لبنان طلع شعر ع لسانو هو ويقول «الليرة بألف خير»، وليكي وين صرنا، صرنا كلنا مليونيرية عاللبناني، وصارت الليرة بـ100 ألف خير، وقريبًا بـ200 ألف خير، وانشالله ع زود. حتى العدالة عنا بمليون خير، والشعب أكيد راضي لأنو عنا قاضي بيلبط إجرو بالأرض، ويا جبل ما يهزّك ريح، ورح يرجِّعلنا أموالنا المنهوبة، ويكبّ كل الفاسدين بالحبوسة. معقول الشعب يكون تعيس وعندو قاضي متل القاضي عون؟؟؟؟

– عم تقصد غادة عون؟ أخ منك يا زوهايمر، غادة عون مرا يا بو توفيق.

– غادة عون رجّال وإخت الرجال، وبـ100 رجّال.

– أخ منك يا بو توفيق، مش بس رح تعملّي إكتئاب، رح تعملّي أعصاب كمان.

– ع سيرة الأعصاب، قريت إنو علماء الأعصاب بلندن قالوا إنو الناس اللي بياكلو بوظة، قوام بيحسّوا بالفرح والسعادة. لهيك تفاءلي يا إم توفيق، الصيفية جايي، وخدلك ع أكل بوظة… لوين رايحة؟

– قايمة آكل بوظة، قبل ما ينقطع الموتور، وتدوب… سعادتي المحطوطة بالتلاجة يا بو توفيق.

للإشتراك في “المسيرة” Online:

http://www.almassira.com/subscription/signup/index

from Australia: 0415311113 or: australia@almassira.com​​​​​​​​​​​​