كتبت جوزفين حبشي في “المسيرة” – العدد 1741
– ينعاد عليك حبيبي بو توفيق، وتضلّ فوق راسنا، وعامود بيتنا يا سَنَدي.
– يا حرام يا إم توفيق، وقال بتتهمني إنو أنا زوهايمر عالآخر. عيد شو وعامود شو؟ أنا خلقان بشباط، وأنجأ إسند حالي عالعصا.
– حبيبي بو توفيق، فتنا بشهر حزيران يا سَنَدي، وبحزيران شو في؟ حزيران يعني أب.
– يا تعتيري جنّت المرا. شو خص شهر حزيران بشهر آب.
– مين جاب سيرة شهر آب؟ أخ منك يا بو توفيق، بتضيّع لِ ما بيضيع. بشهر حزيران في عيد شو يا خرفان؟ عيد الأب يا بيّ عيلتنا.
– أأأخ، أخ.
– زوهايمر فهمنا، بس طرش كمان؟ عيد الأب، الأب، مش الأخ.
– ولك عم قول أخ لأني أصلاً موجوع، وإنتي هلأ فتّحتيلي جروحاتي. عن أي أب عم تحكي؟ بأيّ عيد بدنا نحتفل؟ ليش نحنا بلبنان عنا بيّ؟ خلص، بحححح، راح بيّ الكل اللي كان عاملّنا هيبة بالعالم كلو، وصرنا أيتام من دون بيّ، وما حدا عم تزبط معو يتبنانا. وبيناتنا، مش لابقة غير لصهر بيّ الكل، لأنو الصهر سندة الضهر والجمهورية. وبدك للصراحة يا إم توفيق، ميشال معوّض مش لابقلو يكون بيّ، إنو كتير «جون».
– جون؟؟؟
– إيه، يعني شبّ بالفرنسي.
– وبالإنكليزي، جون يعني حزيران. فخلينا نرجع لعيد الأب. كيف بدنا نِحتفل؟
– نِحتفل بشو؟؟؟؟ حزيران شهر الأيتام بلبنان. نحنا أيتام وما الهيئة رح يكون عنا بيّ. ولهيك صرنا علكة بتمّ المجتمع الدولي، وعَ عيون كل شي في كاميرات وتلفزيونات. أخخخخ لا بقى تذكرينا، تفووو.
– عم تبزق بوجّي يا بو توفيق؟
– عيب يعني؟ ما وزيرنا بزق العلكة بوجّ كل شي في كاميرات وتلفزيونات بالقمة العربية. امسحيها بدقني يا إم توفيق.
للإشتراك في “المسيرة” Online:
http://www.almassira.com/subscription/signup/index
from Australia: 0415311113 or: [email protected]