.jpg)
كبت عضو تكتل الجمهورية القوية النائب بيار بو عاصي عبر “فيسبوك”: “إبني جريس أزعر؟
– الله معك طانيوس.
– اهلا بو جريس. وين هالغيبة؟
– مش عم بضهر كتير.
– كيفك؟ كيفا ام جريس؟
– مش منيحة. حابة تموت ومش عم تزبط معها. بالاخر رح تزبط معها. كلنا رح نموت.
– شو هالحكي يا بو جريس. سلامة قلبك وقلبها. تفضل قعود.
– لا معليش، مستعجل شوي، بدي امرق على خليل إسأله سؤال. طانيوس، بدي ياك تقلي الصراحة.
– ولو يا بو جريس بعد عِشرة هالعمر.
– طانيوس، ابني جريس، أزعر؟
– شو عم تحكي؟ جريس منرفع راسنا فيه. من هو وزغير كلّو نخوة. بالنادي، بالرعيّة، وين ما كان شاب متل النمر وكل الضيعة بتحلف وحياته…
– بس عم يقولولي انو أزعر. انا ما ربيته تيكون أزعر. ما عندي غيره. ما في احنّ منّو عليي وعلى امّه.
– وحياتك، جريس زينة شباب الضيعة.
– بتعرف، يوم فات عالقوات ولبس البدلة وراح يتدرب وبعدين صار يروح عالجبهات كان مقطوع قلبي عليه، ما عندي غيره، بس يا بيي شو كنت شايف حالي فيه.
– الله يرحم ترابه. كان بطل بينشاف الحال فيه. كل الضيعة بتحلف برحمته. يوم اللي استشهد بكينا عليه دم. جريس شهيد حبه لأهلو وضيعتو ولبنان.
– بس ليش عم يقولو عنو ازعر؟
– الناس بتحكي شو ما كان. شو بدك فيهن. دخَّلو دم الشهداء بلعبة السلطة، الله لا يوفّقهن.
– يعني جريس مش ازعر؟
– ضفره بيسوى كل العم يجيبو سيرته.
– ممنونك. اخدت من وقتك. تَروح عند خليل.
– انت بالقلب يا بو جريس. الله يرحم تراب جريس ويصبّرك. انتبهلنا على ام جريس وما تطوّل الغيبة علينا.
– عليك خير…
– الله معك خليل.
– اهلا بو جريس. وين هالغيبة؟
– مش عم بضهر كتير.
– كيفك؟ كيفا ام جريس؟
– مش منيحة. حابة تموت ومش عم تزبط معها. بالاخر رح تزبط معها. كلنا رح نموت.
– شو هالحكي يا بو جريس. سلامة قلبك وقلبها. تفضل قعود.
– لا معليش، مستعجل شوي، بدي امرق على مخايل إسأله سؤال. بدي ياك تقلي الصراحة.
– ولو يا بو جريس بعد عِشرة هالعمر.
– خليل، ابني جريس، أزعر؟”.