كلمة رئيس حزب “حركة التغـيير” المحامي ايلي محفوض بعد لقاء وفد من قيادة الحزب سماحة مفتي الجمهورية اللبنانية الشيخ عبداللطيف دريان:
“لا يريدون الدستور ولا الطائف ولا يلتزمون بالقانون ولا يعيرون اهتماما لقرارات الأمم المتحدة.. ولا بدكن الجيش شو بدكن؟ دولة عقياسكم عحسابكم عوقتكن عمزاجكن؟
عندما نتحدث عن إحترام سيادة لبنان وسلامته الإقليمية ووحدته واستقلاله السياسي تحت سلطة حكومة لبنان وحدها دون منازع في جميع أنحاء لبنان منكون عم نحكي عن القرار 1559.. وقت منحكي عن ضرورة إنسحاب جميع القوات الأجنبية المتبقية بلبنان منكون عم نحكي عن الـ 1559.. وقت منحكي عن حل جميع المليشيات اللبنانية ونزع سلاحها منكون عم نحكي عن الـ 1559..
إن تأييد سيطرة حكومة لبنان على جميع الأراضي اللبنانية.. إن تأييد عملية انتخابية حرة ونزيهة في الانتخابات الرئاسية المقبلة تجري وفقا لقواعد الدستور اللبناني الموضوعة من غير تدخل أو نفوذ أجنبي…كل هذه العناوين هي القرار 1559.
بالمقابل صرلنا من الـ 2005 من لحظة اغتيال رفيق الحريري ما انضرب ضربة إنماء وإعمار ونمو بالدولة لا بل بالعكس لم يبقوا على أي معلم من معالم الدولة كي يعيش اللبناني حياة كريمة مثله مثل سائر شعوب العالم.. لكن لأ نحنا ممنوع علينا نعيش.
هيك ما فينا نكمّل وهالكلام عم قوله اليوم للأصدقاء والحلفاء قبل الخصوم هيك ما فيكم تكملوا.. 100 ملف وملف علقانين وما قادرين نفشخ فشخة لإدّام.. ما بدكن الجمهورية ما بدكن الدستور ما بدكن الطايف خيي خبرونا حتى نعرف شو بدنا نعمل لا بدكن تحكو مع حدا واذا حدا قرر يحكي معكم ما عندكن إلا لغة التخوين والتهديد والمسدس عالطاولة.
أما بالنسبة لما تعرّض له الجيش اللبناني هون في ناس مُطالَبة بالاعتذار من قيادة الجيش ومن جوزف عون بالتحديد وهيدا الاعتذار ضروري اولا لان في جماعة اتهمت وراجعت القضاء وتبيّن انو كل اتهاماتها باطلة فيشرّفو يعتذرو ومش عيب اعتذاركم من بعد حملة التشويه اللي عملتوها”.