ناس ورا ناس عن تركض بهاللّيل
متراس ورا متراس والحكم هوّي اللّيل
صحابي ورفاقي راحوا لبعيد
بيت عن يتهدّم مع كل يوم جديد
خيّي وينوّي؟ … راح مع ل راحوا
رفيقي وينوّي؟ … راح مع ل راحوا
جارتنا الختيارة ليش بتصرّخ…
تخمين عندا حدا راح مع ل راحوا
الضَحكة الحلوة … عالوجوه ماتت
والقنابل جوّات الدّار فاتت
مين منسأل … مع مين منحكي … واللّي راحوا راحوا وارتاحو
بكرا بيرجعوا … بيرجعوا بولادن
ولادن بكرا بيكبروا … بيكبروا وبيكترو
شايفهن عن بيعمروا وطنهن يلّي تدمّر،
والوجوه الخوتة بيزتّوها من هون،
وجوه ملوّنة بألف لون ولون،
الكل بيخلصوا … كلّن بيروحوا
ووحدك اللّي بتبقى يا وطني لبنان
ووحدك اللّي بتبقى يا وطني لبنان
نزيه م. جعجع – 18 كانون الأول 2013