خاص ـ صوت اليسا ما بيسكت.. حقها ما بيموت

اليسا عم تسأل “كيف الواحد بيوصل لحقو بهيدا البلد “؟ وديع الصافي غنّى  يا اليسا بيوم من الايام ” يا رب لا تهجر سما لبنان، وتتركو للبوم وللغربان”، بس الله لحد هلأ ما استجاب. ما بعرف شو حكمة ربّنا ، بس اللي انا مأكدة منه ” الله يمهِل ولا يُهمِل”، والتاريخ بيشهد انو ما في ظلم استمر، وما في ظالم إلا وما كانت نهايته وخيمة، وما في مُغتصب حق وكيان وجسد دولة وروح شعب، نِجي بوساخته،وما في حق ضاع ووراه صوت مُطالب، قادر يتحوّل بثواني مليون “صوت” و “سوط” بوج الطغيان…

صوتك يا اليسا كان وبعدو ورح يبقى بمليون صوت، ورح يبقى يقول”يا ظالم ما فيك تجرب تكسرني لو ما أنا برضى وبسكتلك”. معقول  اليسا ترضى بالظلم، إلها و لوطنها، و لأي مظلوم بالعالم كله؟ اليسا المُناضلة والمؤمنة بربها ووطنها  والقانون،  ما بحياتها سكتت عن حقها وحق شعبها وناسها بالحرية والكرامة والعدالة القضائية والإلاهية.

اليسا اللي انتصرت على كل اشكال  الامراض النفسية والاجتماعية والجسدية اللي واجهتها بشجاعة بحياتها،  بتعرف انو وطنها مريض بسرطان من نوع تاني. سرطان شيطاني، عم ينخر  الاساسات بنيترات الفساد والاجرام والسرقة بكل انواعها، المادية والمعنوية، والمحسوبيات والتلاعب بالقضاء وقطع اوكسيجين الامل عن شعب عم بيقاوم بالعناية الفائقة من سنين وسنين. بس اليسا بنت ارض الشجاعة والعنفوان والصلابة،  اللي انتصرت على سرطانات لا تعد ولا تحصى، معقول تستسلم قدام سرطان خسيس واطي نذل جبان مجرم عم بيحاول ورح يبقى يحاول يقضي على بلد بأمو  وبيّو؟ صوت اليسا ما حدا فيه يسكّتو، لأنو صوت الحق. والنسر مهما انقهر وجناحو  انكسر ، مصيرو  ينتصِر ويرجع يحلّق بالعالي، لأنو  معوّد عالحرية والاوكسيجين .

لا الاقفاص المخباية متل وطاويط الليل تحت الارض ممكن تكون وطنو،  ولا وطنو  المريض ممكن يستسلم للسرطان. نعم، حق اليسا رح يرجع، لأنو رجعة الحق لكل صاحب حق ،هي الامل الوحيد انو لبنان راجع راجع يتعمّر ، وراجع اخضر حلو،  سويسرا الشرق ومنارة الشرق والغرب من دون بوم وغربان.

لأ، مش بسحر ساحر عم بيطلّع ارنب جبان من طاقيتو السودا متل ما عم بيصير  ، ونعم، باتحاد شعبو  المتمسّك بالحق والعدالة اللي وحدن  ممكن يتحوّلوا قضية رأي عام ويخلّوا  السحر يقلب عالساحر. حق اليسا راجع راجع ، لأنو الحق مش شعارات فارغة منكتبها بالطبشورة عالحيط، ومنرَجِّع من خلالها اللي بيسوى و ما بيسوى. الحق حق، يعلو ولا يُعلى عليه، والعدالة بس بس وحدا، على اليسا  وعلى كل مواطن حر  وشريف “بتمون”.