ضيفتي في “قهوتك كيف” هذا الأسبوع المناضلة أنطوانيت شاهين.
*أنطوانيت شاهين قهوتك كيف؟
وسط.
5 *أسئلة سريعة
-الشغل أو العيلة؟
العيلة.
-الماضي أو المستقبل؟
المستقبل.
-الشخصية الصريحة أو الشخصية الكتومة؟
الشخصية الصريحة.
-الإنسان المتألم أو الإنسان المبنّج؟
مرّات بنقول يا ريت فينا نتبنّج وقت الألم، بس بالحقيقة حتى المبنّج رح يجي وقت ويرجعلو الوجع.
-الحقيقة الفجّة أو الدبلوماسية؟
الحقيقة ما بتقدر تكون إلا فجّة.
*أنطوانيت شاهين وشقيقتاها متزوجات من 3 أشقاء. ما سر الحب الذي خلق بين العائلتين وإلى أي حد لهذا الأمر تأثير على حياتك وحياة أولادك؟
شقيقتاي حنان وسميرة تزوجتا شقيقَي زوجي جوزيف قبلنا بنحو 13 سنة، طبعاً جوزيف عاش مع شقيقتَي كل الألم ومسح دموعهما، ووالدته تحبهما جداً وهناك رابط مليء بالاحترام والمحبة بين العائلتين.
بعد خروجي من السجن ويوم تقدَّم لي جوزيف، كان زواج العقل والحب والاحترام، إذ إنه يعرف قصتي وأنا أعرف أخلاقه وأهله، وهكذا تكلّل الزواج بمباركة والدته التي كانت عرّابة الخطوة وطبعاً أهلي.
بالنسبة للتأثير على الأولاد، نحن 3 بيوت وكأننا بيت واحد، أنا أسافر ولا أقلق أبداً وأعتبر أن زواجي إلى جانب شقيقتَي هدية من الرب لأنهما تهتمان بعائلتي بغيابي. أولادنا جميعاً يعتبرون أن لديهم 3 أباء و3 أمهات.
*نضال ما إلو حدود، وثمن غالي كتير دفعتو أنطوانيت شاهين إثر إيمانها بقضيتها. بعد كل هالسنين، كيف بتنظري لكل يلي تعرضتيلو؟
بفخر وإيمان وإنو قضيتنا انتصرت على الظلم وما بصح إلا الصحيح.
*”زعل أنطوانيت شاهين صعب، يا ريت بتغضب وبتصرخ”. هيك بيقولوا المقربين منك. بتعاقبي الناس بهالطريقة أو بيصعب عليك التعبير عن إحساسك مباشرة؟
أنا ما بحب الصريخ وصادقة بإحساسي، وزعلي ما بطول.
*على الرغم من عذاب ومسار طويل من الألم، استطاعت أنطوانيت شاهين تكوين عائلة وزواج ناجح. ما الرسالة التي توجهينها اليوم لزوجك جوزيف صليبا؟
أنا وجوزف تزوجنا زواج عقل واحترام، بس هلق كل الحب الموجود بالعالم مِنّي لجوزيف لأنو إنسان محب وحنون وأب رائع وهوّي رفيقي وصديقي وزوجي لي بحبو كتير. بقلّو إنت هديتي من السما لأني حملت صليبي بفرح، الله يطول بعمرك. والله رزقنا ولدين جويا ورواد.
*شخص واحد لم تسامحه أنطوانيت شاهين إثر ما تعرضت له؟
أنا سامحت وربّنا عطاني نعمة إنو ما عندي حقد وضغينة بقلبي، بس شخص واحد عندي غضب ضده، هو يلي “لبط” إمي مرة ووقعت وقت كانت رايحة تسأل عني.
*أكبر خيبة أمل في حياة أنطوانيت شاهين؟
-أكبر خيبة أمل بناس كانوا عايشين ببيتنا ومقرّبين منّي، بس وقت تم توقيفي ما عادوا سألوا عني.
*هل تصالحت أنطوانيت شاهين من الداخل مع جروح ماضيها الكبيرة؟
أكيد وإلا كنت عايشة بسجن تاني وما كنت نجحت بحياتي بعد السجن.
*بالسياسة:
كيف تقرأ أنطوانيت شاهين الشغور الرئاسي الذي يدمّر ما تبقى من لبنان الدولة خصوصاً في ظل الحرب الدائرة في الجنوب؟
من أبسط حقوق اللبنانيين إنو نوابهم ينتخبوا رئيس للجمهورية، قبل نهاية كل عهد. من أبسط حقوقنا إنو يكون في دايماً على رأس الدولة حامي الدستور والمؤسسات وضامن حقوق الناس. الفراغ وضع غريب، مش مقبول يتكرر بعد نهاية كل عهد، ضروري يكون في عنا رئيس جمهورية يضمن كل حقوقنا ومنها حقنا إنو نعيش مرتاحين، ومن دون ما يبقى سيف الحرب دايماً فوق راسنا. هالفراغ يلي عايشينو وضع غريب ومرفوض، رئيس الجمهورية رأس الدولة، كيف ممكن تكفّي دولة بلا رأس؟.