.jpg)
ضيفي في “قهوتك كيف” – “لو بيرجع فيك الزمن لورا” هذا الأسبوع النائب السابق أنطوان زهرا.
*أنطوان زهرا لو رجع فيك الزمن لورا، شو كنت بتغير بحياتك؟
أكيد ما بغير شي لسببين:
الأول إنو حياة كل انسان مرتبطة ببيئته وظروفه.
التاني إنو إنا انسان متصالح مع نفسي ومع تربايتي وتاريخي ومبادئي، وضميري مرتاح.
*لما ترجع بالزمن لورا، شو الجرح الأصعب يلي عاشو أنطوان زهرا؟
كل جرح عشتو وكنت اعتبره الاصعب عند حدوثه، كان استشهاد أحد الرفاق، بس مع الايام وصلت لقناعة انو محبتي وامتناني لتضحيات كل رفاقي بيبقوا، لكن ع المدى الطويل فقدان الاهل وخاصة الام هو اللي بيرافقنا لآخر العمر.
*لو رجع فيك الزمن لورا، شو القرار يلي مستحيل تاخدو؟
*قرار عائلي:
بالعائلي ما فيه شي ندمان عليه.
*قرار اجتماعي:
الاقدام على الارتباط الجدي بعلاقة او عمل، استمراره مش اكيد.
*قرار سياسي:
بالسياسة، بعتقد إني كنت صريح ولايق وعلى الرغم من الخصومات الشديدة ما عندي عدو.
*أنطوان زهرا لو رجع فيك الزمن لورا، شو الغلطة يلي مستحيل تعيدها؟
تغليب الالتزام الحزبي على القناعة الشخصية العميقة اللي هي نتيجة تجربة طويلة.
بالعربي المشبرح (مع إني ما رح واجها من جديد) انتخب ميشال عون، علماً بانه لا انا راجع نايب ولا هوي راجع يعيش حياتو من جديد.
*حب بترجع تعيشو لو رجع فيك الزمن لورا؟
بعيش متل ما عشت بلا اي ندم مع حفظ المودة والاحترام والتمني بالتوفيق لكل اللي مرقوا بحياتي، بس بيبقى الحب الثابت والاهم واللي عم عيشه مع زوجتي اللي هي الخاتمة السعيدة لمسار حياتي.
الاهم انه كل شي بوقته منعتبره الاحلى والا ما منعمله.
*لو رجع فيك الزمن لورا، أنطوان زهرا شو بتغير بشخصيتك؟
مادح نفسه يقرؤك السلام.
راضي عحالي والحمدلله وما بدي غير شي.
*على شو بيندم أنطوان زهرا اليوم؟
يمكن طيبة القلب الزايدة.
يعني لأني صادق بصدق مين ما كان وبس يبين الكذب بنزعج كتير، وعلى طول بقول يا ريت تحريت اكتر، خصوصي اذا فيه رأي عطيته استناداً لحكي غلط وصل لي وبنيت عليه.
بندم على شي ما كنت اتوقعه.
ما خبيت قرش الابيض لليوم الاسود لانه ما تخيلت تتزامن تلات ازمات ضخمه وتترك هالاثر، وهي الانهيار الاقتصادي اللبناني والكورونا وازمة طالت الشركة العائلية اللي كنت اشتغل معها بدبي. صرت اسأل حالي، معقولة بعد كل الي صرفته بلبنان خلال العمل بالشأن العام اوصل لوقت ما كون املك الا شقتي اللي ساكنين فيها وما شي تاني لا للصيف ولا للشتي، عكل حال كتر خير الله عكل شي.
أسئلة سريعة
* كنت بتفوت ع معترك الحياة السياسية؟
بترك الجواب على هالسؤال للي بيقدر من خلال عشرتي ومعرفته لشخصيتي لصعوبة تقييم الانسان لنفسه.
* كان بكون عندك ذات الأصحاب؟
اكيد اكيد اكيد
* كنت بتدعم ذات القضايا السياسية؟
طبعاً، وبأفضل طريقة ممكنة.
*كنت بتعيد نفس المغامرات؟
نفسها ومتلها واكتر.
*كنت بتعطي السياسة الوقت الأطول ع حساب عيلتك؟
تكون انا بالتزامي وصدقي وشفافيتي وشو ما كان معروف عني اكيد، بعيد نفس الاسلوب ولو تعرضت لنفس المخاطر واكتر وطبيعي تكون على حساب عيلتي، بس بخبرك سر مع انو بيخافوا عليي وبيحبوا يشوفوني اكتر، الحمدلله بيفتخروا فيي وصلاتهم مرافقتني وحاميتني مع رضى اهلي عليي ودعواتهم اللي مرافقتني.
*ع فكرة قهوتك كيف؟
ساده بلا زيادات وسخنة تتنشطني وشكراً على هالجلسة.