.jpg)
ضيفي في “قهوتك كيف” – “لو بيرجع فيك الزمن لورا” هذا الأسبوع عضو تكتل الجمهورية القوية النائب بيار بو عاصي.
*لو رجع فيك الزمن لورا، شو كنت بتغير بحياتك؟
سمحيلي حدد اني ما بتمنى ابداً يرجع فيي الزمن لورا. بحب اللحظة اللي بعيشها وبتطلع بفرح وثقة للمستقبل ومفاجآت الحياة.
بس إذا انتي بدك هيك تكرم عينك.
لو رجع فيي الزمن لورا ما كنت دخلت الجامعة، لا حقوق ولا ادارة اعمال. منظومة التعليم اللي بحترمها مش لإلي. خياري بالحياة المغامرة والمعرفة. الكتاب رفيقي الدايم والناس وتجارب الحياة هني المدرسة اللي اخترتها واللي تعلمت منها كل شي بعرفه.
*لما ترجع بالزمن لورا، شو الجرح الأصعب يلي عشتو؟
بدون أي لحظة شك استشهاد رفاقي. الجرح الوحيد بحياتي يلّي ما لحم ولا رح يلحم.
*لو رجع فيك الزمن لورا، شو القرار يلي مستحيل تاخدو؟
زعلت أنا وشاب متل خيي وقررت اقطع علاقتي فيه. كان الحق عليي ميّة بالميّة. الكبرياء خلاني ضحّي بأغلى شي وهو الصداقة الفعلية. الكبرياء بيعمي البصر والبصيرة وبيخلي الإنسان يعتبر انو دايماً على حق والكل غلطانين. لحسن حظي لا حَقد ولا نَقم عليي وقِبل اعتذاري. تعلمت درس كبير. التواضع قبل كل شي.
*لو رجع فيك الزمن لورا، شو الغلطة يلي مستحيل تعيدها؟
علاقتي مع المال والمادة كل عمرها كتير سيئة. أنا بعدني مقتنع انو الانسان مش لازم يعيش كرمال المال. الحياة أغنى بكتير من المصاري. ولكن في حدّ ادنى من الانتباه وتأمين مستلزمات الاستقرار المادي. لو رجع فيي الزمن كنت صمّدت واشتريت بيت. بعتقد.
*حب بترجع تعيشو لو رجع فيك الزمن لورا؟
قال الفيلسوف اليوناني هيرقليطس “لا تستطيع ان تستحم مرتين في نفس النهر”. حدود النهر هي ذاتها بس الميّ الجارية فيه كل ثانية بتتغير. من هون استحالة رجوع الزمن لورا وخاصة بالحب لان المياه الجارية بالنهر ما بترجع لورا.
حبيت معلمتي فاديا بالمدرسة بس كان عمري خمس سنين. كنت انطر الصبح لروح عالصف وشوفها. فجأة اختفت وما تركت اثر. عرفت بعدان انها تزوجت وراحت تعيش باميركا. كان حزني كتير كبير. ضليت فتش عليها خمسين سنة حتى رجعت شفتها وكانت فرحتي لا توصف. المفاجأة الكبيرة انها كانت بعدها مذكرتني ومحتفظة ببعض الامور يلي بتخصني. الها مكانة كتير كبيرة بقلبي ورح ضل حب هل الانسانة الرقيقة وضحكتها الحلوة وقلبها الحنون.
*لو رجع فيك الزمن لورا، شو بتغير بشخصيتك؟
التزامي السياسي وجديتي بخدمة الشأن العام اخدو تقريباً كل حياتي. هيدي الصفة بعتبرها نعمة بس يمكن كان لازم وازن بينها وبين جوانب اخرى. تركت البيت عمري 19 سنة وما رجعت. يمكن كان لازم قضي وقت اكتر مع اهلي وخيي واصدقائي. في شي اجا على حساب شي وما قدرت وفق بين التنَين.
البصمة اللي طبعتها السنين بشخصيتي هي محبتي للناس. كل عمرهن مصدر سعادتي الاول. الارجح كرمال هيك عشت الانفتاح على كافة الشعوب والحضارات وفنونهم وإبداعهم. سافرت كتير وتفاعلت كتير وكل حضارة قدمتلي غنى فكري ثمين جداً.
*على شو بيندم بيار بو عاصي اليوم؟
مغامرة الحياة اللي اخترتها كانت مواجهة دائمة ويمكن قسّتني شوي زيادة عن اللزوم. بندم من كل قلبي على كل مرّة كنت قاسي فيها على حدا بدون وجه حق وبعتذر منّو. الملاكم بيلاكم عالحلبة مش كل الوقت.
أسئلة سريعة
*كنت بتفوت ع معترك الحياة السياسية؟
طبعاً. دخلت على معترك النضال السياسي بعمر 15 سنة. يا ريت بلشت ابكر.
*كان بكون عندك ذات الأصحاب؟
أصحابي ورفاق السلاح هني أصحابي ورفاقي مدى العمر ويمكن اكتر. الصداقة وحدها بتغلب الزمن والمسافة. بس نتلاقى منكون كأننا ما افترقنا بغض النظر قدي مرق وقت أو إذا في محيطات وقارات بيفصلو بيناتنا.
*كنت بتعيد نفس المغامرات؟
مش بس بعيدها. أنا مصمم عيش مغامرات مدى العمر. بس توقف المغامرة بتوقف حياتي.
*كنت بتواجه بهالقد حدية؟
بالشأن العام والمبادىء اكيد لأنو في خيارين، اما المواجهة بصلابة او المساومة. المساومة على هالمبادىء ومصالح الناس جبن وخيانة.
*ع فكرة قهوتك كيف؟
متل مواجهتي السياسية، قويّة وبلا سكّر.