#باقيين

#باقيين

مش لانو ما بقى معنا حق بطاقة سفر

ولانو ما في دولة بتستقبلنا

ولانو صيتنا سابقنا انو حرامية

#باقيين

مش لانو بطاقة الائتمان ما عادت ماشية اوسقفها اجار سيارة تكسي

ولانو كل لي صمدوه اهلنا بي حياتهم او مصريات التقاعد ما عاد يشترولنا شنطة سفر

#باقيين

مش لانو تعودنا ع قرش السهل

وتربينا عالبرطيل

وتعودنا نكب زبالتنا من الشباك ….

ونعلّق ع شبكة الكهربا …

ونصاحب زعيم تنخلّص مشاكلنا

#باقيين

اكيد مش كرمال أكبر صحن حمص ….

او حتى تنصدر أكبر كمية منو ،ما العدو الصهيوني سبقنا بالتصدير،

بوقت كنا نحنا ملهيين عم مندوق،او عم منطعمي بعضنا…

#باقيين

مش لانو متل شهاداتنا صار في كتير

او لانو ما عاد عنا ثقافة……

او ناطرين نشوب معارك تنسرق ما تبقى من اثاث وتحف بالبيوت المدمرة

#باقيين

مش لانو ما عم منلاقي بلد بالعالم بيساع هيدا الكمّ من الكراهية ومن الحقد ومن المكائد ومن المكر ومن الاحتيال ومن الفساد ومن النهب ومن التقاتل ومن الجريمة ومن الحروب ومن المؤامرات…..

او لانو ناطرين كم واحد من ابنائه المرضى المصرّين على الثأر …..

#باقيين

مش تننطر بعد كمية من الدم تنسفك بين مواطنيه تتخلي سد المسيلحة يفيض وينتج كهرباء الى الأبد…….

ومش لانو ما كان كافي اعداد القتلى بين الطوائف او الاحزاب وبين الجبهات بكل المجازر والحروب لي صاروا حتى ولو كان العدد أكبر من اعداد الاحياء الصامدين بهالبلد….

واكيد مش ناطرين تنتفرج على الوحدة يلي انتجت مئات الاف من القتلى والجرحى والمعوقين ….

#باقيين

مش لانو اصلنا فينيقي ومنتباها ولو بالكذب ،انو ابتكرنا الاحرف والسفن واللون الارجواني وأنو نحنا حرقنا صيدا بأنفسنا ت ما نستسلم للعدو

#باقيين

تننطر يمكن …

فدرالية، تقسيم، طلاق جماعي، كونفدرالية، لا مركزية ادارية، متصرفية، قائمقاميتين،انتداب ……

من هيك

#باقيين

و#ناطرين …..

و#عارفين …..

انو هيدا البلد بدو يصير يساع الجميع ……

#باقيين​