يا محابس ساكنة عشوش النسور يا كنايس راقدة بين الصخور
والأرز شامخ عكتافك وخالد بين الله وبيننا مد وجسور
ما كان بقي أرز الرب في لبنان لولا من ترابك يشبع عنفوان
انهدوا السنين قبالك وشاب الزمان بعدك بشري وباقية لدهر الدهور
يا خالدة يا موردة فوق الجبال ساكنك الله عاملك عرزال
من فجر التاريخ بضل فيكي رجال بالحرب نار وبالسلم بحور
أرضك بشري يا نبع حامي الحمى فيكي الكرامة محلقة فوق السما
الغزاة قبالك تحولوا كلن دمى ولا طامع بأرضك إلا رجع مكسور
وبقي الأرز بهمة رجالك وقداسة شربل الواقف قبالك
الكرامة والبطولة هني رسمالك كانوا وبعدن من ماضي العصور
هالأرض ياما إجوها غازيين مغول فرس وأخوة حاقدين
مملوك ترك وجحافل فاسدين تقهقروا وفلوا يعاقبة ونسطور
بشري مهما تكاثر عليكي العدا بترخصلك الدمات بيطيب الفدا
بهمة الأبطال بيصيرو صدى بتضل أرضك دوم للغازي قبور
ما بيصح بهالدني إلا الصحيح بشري مليحة لبناننا بيبقى مليح
يا محافظة بإيمان عا عهد المسيح بالمحبة وبالعطا بعدت الشرور
خلف الجبل عليت الصلوات من الدير وزرازير من بشوات
يصلو تا الله يخلّد القوات يخلد معن لبنان بالعصور
شلال دافق بوادي القديسين للشط واصل عم يحلف يمين
من فوق من بشري نحنا جايين نروض الموجات ونهدي البحور
مش بس في عندك بطولة في جمال من نسمتك جبران صار عندو خيال
تبقي عروس بتبقي عرين بهالشمال كنت وبعدك قلب نابض بالجبال
انت الكرامة وزهرة المنتور