كتبت جوزفين حبشي في “المسيرة” – العدد 1720
… «بابوري رايح رايح بابوري جاي/ بابوري محمّل سكر وشاي»
-ولِك وطّي صوت هالراديو يا بو توفييييق، طوشتنا يا زلمي.
– اتركيني مبسوط ومكيّف مع غنيّة موفق بهجت يا… إنت مين؟ شو إسمك؟؟؟؟
-يا فرحتي ويا بهجتي، ناسي إسمي وذاكر إسم موفق بهجت؟ الله لا يوفقك يا…»زهايمر».
-وبابوري رايح رايح بابوري جاي، بابوري محمّل سكر وشاي
– عن أيا شاي عم تحكي؟؟؟؟ يا مسكين يا بو توفيق، الهيئة بعدو واقف عندك الزمن عند شحنة الشاي السيلاني اللي تبرعت فيها سريلانكا للمتضررين من إنفجار بيروت من شي سنة، أو يمكن.. قدمتها هدية لعيل العسكر بلواء الحرس الجمهوري؟؟؟؟
يا دلّي عليي، صرت متلك خرفانة وعم إنسى. ليك يا بو توفيق، ركّز معي، البابور اللي جاي جاي، محمّل مازوت يا تسلملي، والهيئة رايحة رايحة علينا كلنا. لهيك «هيّي بتوصل من هون، ونحنا لازم نفركها من هون» .
-مين اللي واصلة من هون؟ وردة؟ وسعيدة سعيدة، أهلا بوردة.
-أهلا بالعقوبات إنت الصادق يا بووو توفييييق.
-إيه؟ إنت مين؟
– ولِك أنا إم توفيق. فيق يا بو توفيق فيق، لازم نجهّز باسبوراتنا بسرعة ونهجّ عند هالصبي على كندا. خلص، خلصت قصتنا.
-وخلصت خلصت قصتنا، وكانت قصة حلوة كتير، باي باي، باي باي يا حلوين.
-يا بو توفيييق.
-إيه، مين؟؟؟؟
-يا رب اعطيني الصبر. أنا مهى سلمى.
-كيفك كيفك يا سلمى؟
-في إلنا الله
-شو قلتي؟
-ما قلت شي. أصلاً نص ساعة زمان، ورح ترجع تنسى كل شي.
-يا مسكينة يا سلمى شو سمعها تقيل…
-يا نيالك يا بو توفيق شو «زهايمرك» تقيل.
للإشتراك في “المسيرة” Online:
http://www.almassira.com/subscription/signup/index
from Australia: 0415311113 or: [email protected]