الملاّ عون
"من سيتطاول علينا سنقص لسانه ومن يمد يده سنقطعها"
هذا ليس الملّا عمر أو أحد آيات الله أو أحد أبواقهم في بيروت أو الصحّاف ، إنه جنرال الرابية ، نعم إنه هو ، واثق من نفسه مدركٌ طريقه. بالأمس البعيد القريب تفوه بجواهر الصمود حين قال : سنحارب بالشوك والسكاكين وسأبقى هنا وأموت هنا…الى آخر النكتة المعروفة وتعرفون تكملة قصة الهريبة المشهورة .
جنرال الرابية في حالة التوتر القصوى، لا مهدئات ولا مسكنات ولا حتى مخدرات تنفع معه ، فيللا الرابية تضج بالزعيق والتكسير والشتائم من تحت الزنار الى أقرب المقربين ، حتى السقايات والبسينات والزيز المشهور أخذوا الحيطة والحذر .
تقارير وإحصاءات جعلت وجه جنرال الرابية يمتقع باللون البرتقالي الفاقع ، معقول ؟ معقول ؟ شو هالتقارير ؟؟ مين وين بتصيروا تجيبوون ؟؟؟؟ مينوي هيدا الهبيلي يللّي عمل الإحصاء ؟؟ مطرود من التيّار ، ما بدّي إسمع كلمة عن تراجع شعبيتي وإلا بطردكن كلكن من التيار …..وووووو نقبروا من وجّي .
طلّ جنرال الرابية على الصحافيين الذين لبسوا الدروع واحتموا بما طالت أيديهم من كراسي ، أحدهم حمل حذاءه وحاول الخروج من دون أن يلاحظه حرّاس ومرافقي الجنرال الأشاوس ولكنه نال نصيبه بعد أن كمشه أحدهم ظناّ منه أنه ينوي ضرب الجنرال بحذائه ولكن تمت تخليته بعد أن تبين أن الحذاء صنع في إيران ، ظمط ….
كتلة وسطية قال !!! بدن كتلة كللن وبالقشاط……أنا الجنرال العظيم ، ممثل السبعين بالميّة بليلة ما فيا ضو قمر بيطلعلي كتلة وسطية ؟؟؟ بعتولي ورا جيجي ونونو وعبّوسي ، شو عم يعملوا بهالنهارات ؟؟؟ صايرين بيطلعوا عالمنار أكتر ما بيطلعوا عالرابية…..
اقترح أحد مستشاري الجنرال المسؤول عن التسخيف السياسي أن يتم تحضير كم جديد من الأكاذيب والشائعات والفبركات وفتح قبور ومنادل لعل وعسى….
الجنرال :وينن ؟؟
العونيين : مين يا جنرال ؟؟؟ عن مين عم تسأل ؟؟؟ عن المعتقلين بالسجون البعثية ؟؟؟
الجنرال : لأ يا غشيمين
العونيين : عن اللبنانيين المنفيين والمهجرين الى إسرائيل ؟؟؟
الجنرال : للللل لأ ، ممممم مين وين بتصيروا تجيبولي هالأجوبة السخيفة ؟
العونيين : الناس يللي تركوك ويللي عم يتركوك يوم بعد يوم ؟؟؟
الجنرال بعصبية : عمرن ما يرجعوا ، الله لا يردن ،شو أنا سئلان عنن ؟؟؟؟
العونيين : طيّب مين يا قائدنا الإلهي المعظم ؟؟؟
الجنرال : هلأتنية انهبلتوا ؟؟ بطلتوا تعرفوا مين ؟؟؟ وينن الديبلوماسيي الإيرانيي الأربعة ؟؟ موضوع إجا شحمة عفطيرة من حليفنا الإلهي شو ناطرين ما بتبلشوا تهاجموا هالقوات الزعران ، معقول ننطر السيّد حسن يفتحلنا قبر بعد ما كنّا نحنا نفتح قبور ؟؟؟
العونيين بخجل : بس ما إنت قلت إنو الديبلوماسيي والصحافيي الأجانب يللي خطفن وقتلن حزب الله ما كانوا سوّاح ، فا اعتبرنا نحنا هالشي بينطبق ع إخواننا الإيرانيي .
الجنرال : شووووووووووووو ؟؟؟
وانقطع الإرسال وشوهدت منافض وصحون وجرّات من العيار الثقيل تتطاير وأصوات صراخ وأنين وبكاء وتوسل واعتذارات ووعود بعدم تذكير أو تذكر الجنرال بأقواله ومواقفه السابقة .