دحرج حجر عن بابك وشق التراب
كيف عاد فيه يساعك مجال القبر!؟
قوم!…
صوب الوحش سامع نعيق غراب
والديب كاتب نعوتو بآخر وبر
قولك بأيّا حبر عم تنعي الدياب؟
بعلمي أنا النعوات مسودّي الحبر
لا تقول صارت تكتب بجرح النياب
هيّي اللي كانت تنهش بصدرك شبر!
إمّك ما عادوا دموعها حرّاس
صاروا إلك بوسات ع خدّك
سبحان يللي مدوزن المقياس
بلّش بردّك مين بيردّك!؟
مشّط غيوم السود… في قدّاس!
زيح البرق عالشرق… من حدّك
في “غبار سمّ” مصلبطة عالناس
ودّي الشتي اللي مْلَيِعْبو بْيَدّك
وقّف بقلب الريح عالمتراس
سيف العدالة مشّقو بقدّك
باب الوحش مفتوح عالوسواس
غيّر مصاير قدّ ما بدّك!
بلّش بردّك… مين بيردّك!