يا أرزة بشري الأبية تنهدي وخلي دموعك يحفروا بقلبك غدير
ونادي لفريدك كلما الحادي حدي وكلما لأجل حفظ الوطن دق النفير
هيدا الندَر ذاتو بأول ما بدي وجنّد حياتو لجيشنا راعي المصير
وعا حدودنا يسهر ويصد المعتدي ويكتب بدمو اسم لبنان الكبير
ويا بشري المن قديم معودي تجابهي جنون القدر والزمهرير
وبأرزك الشامخ شموخو السرمدي تفيّأ الدهر وبفييتو بعدو أسير
وحقك إذا حزنت وإذا بتستفقدي لهيبة أبو جوزف بالظرف الخطير
وحقك إذا تياب الحداد بترتدي وتندبي الشهم الوفي الحر الضمير
هيدا السقي الأرزات من قلبو الندي هيدا اللي رشرش عالوطن طيب وعبير
هيدا البقي للبنان روح مجندي وما وفر لأجلو قليل ولا كتير
هيدا اللبس بدلي أصيلي معمدي بكرامة الجيش العا موطنا خفير
هيدا لأجل لبنان إيامو فدي وكان العجيني الصالحة وملح الخمير
بيكفي قبل ما يغيب الهدايا هدي لأرزنا تيضل مخضّر ونضير
بإبنو جوزف العلم منو بيهتدي ومنو الشعوب تزودوا الكنز الوفير
ويا أرزة بلادي العظيمي تأكدي لولا انتهى عمرو لفريد بيبتدي
ما زال باقي يحرسك إبنو سمير
بموتك انضام السيف وانشل القلم ووادي قاديشا غرقت ببحر الألم
وبالعلم لفوك تا صار النشيد يودع علم بالنعش ويحيي علم
انت الحفظت لجيشنا الباسل رصيد وسلمت قلبك متلما القلب استلم
مهما بموتك جنت مواج النهيد لا تلومنا ولا تلوم إحساس انكلم
انت الكنت معروف بالظرف الشديد تحمل ظلم غيرك إذا الغير انظلم
إمشي يا ست ماري طريق الجلجلي بغيبة أبو جوزف حزن تحملي
ولو أرملي صرت ورب البيت مات بتضلك اللبوي البمجدو مرسملي
تارك أبو جوزف خزنة ذكريات انت ودمع نهاد فيها تأملي
بيرجع أبو جوزف عاقلب الحياة وبتفيق أمجاد الرجولي من البلي
وهلق وطنا بالعويل وبالحدا بيودعك والدمع عربش عالصدى
وانت بتصلي لموطنا التعيس تايطيب جرحو وينعشو قطر الندى
مهما المسافي بينا وبينك تقيس انت الأماني الخالدي ونحنا الفدا
من السما بتقلنا القول النفيس لبنان بوجودو الخبر والمبتدا
وأحلى الفراغ يكون عاكرسي الرئيس ولا بالظلم يقدر حدا يحكم حدا
منودعك بالدمع وبعطر الخزام يا بو جوزف اللي متوّج بتاج الدوام
القوات عم تبكيك وتزيد النحيب يا بي قائدها بأماني وإلتزام
حتى إذا بتغيب مش ممكن تغيب انت التخيري بعنقنا وانت الوسام
ومعروف عنك للقريب وللغريب القلوب تجمعها وما بدك انقسام
وهلق أملنا بجاه فادينا الحبيب من السما تصليلنا وتجلي الظلام
تا جرح لبنان هالمرة يطيب وما يضل مضرب للتحدي والسهام
انشالله بسمير يكون في عنا نصيب والجمهوريي ترجع لأصحابها
وحكم العدالي يسود ويعم السلام