.jpg)
ما خبروك لوين جايه؟! المذود لي نمت فيه من ألفين سنة حطوا فيه سلاح الارهاب…
ما خبروك انو الاقمطة لي لفتن عليك مريم صاروا حمر من دم لي كانوا ناطرينك….وقتلوهن.
المغارة؟ لمّا عرفوا انك جايه حرقوها باسم القرآن والانجيل… رماد المغارة عملت ستي منّو بخور…
ما خبروك إنّو وجوهنا لونتها الاحزاب… ما خبروك انّو قلوبنا لوثها الدين… ما خبروك انو خبزنا ريحتو بارود… والولاد يلي كنت تلعب معهن انت بزواريب الناصرة وبساحات اوراشليم خسرو جوانحن وزاحفين عالعتمه…
ما خبروك انو الخي قتل خيّو بسكين الورته؟ ما خبروك انو عم بيموت الملايين والقائد نايم ع اصوات امهات عم تندب؟
ما خبروك انو شجر بلادي عم يشحد فيزا للسفر؟
ما خبروك انّو انا تغيّرت… اتعلمت احقد، اتعلمت إلعَن، صرت خاف من وجوهن وناطر الوحش.بعيونن…
خبروك واكتر وانت جايه لانك بتعرف كل الحكايه… غريب انت بحبّك… بيفكروك مجنون…
خبروك وجايه رغم كل شي لانو اذا ما جيت، انت بتبطل انت…جايه تعزف بقلوبنا سمفونية الرحمة… جايه تلوّن وجوهنا بنار الانجيل… جايه تعطّرنا من قارورة طيب المجدلية… جايه تحملنا ع كتافك المجروحة وتخبّر الكل انك لقيتنا، جايه تعمّر مغارة جديدة وتروح…ويوعى طفل بقلبنا كنا مشتقلينلوا كتير…