يا خيي ….وين رايح؟…خدني معك
ربينا سوا….مشينا سوا…رحنا سوا…وغرقنا سوا… وبعدين؟
ما قبلت تسافر لوحدك اخدتني معك…بشكرك يا خيي…
بس تركنا ورانا حنا ومنى…ريتا وماريا…وكل الناس لي حبونا…
مبارح بهل الوقت كنا عم نمشي سوا…ايدي ب ايدك…وبلحظة…وقف الزمن….وقعدنا نحكي…
بتتذكر يا خيي….هيصاتنا وضحكاتنا لي ركضت قدامنا بساحة الكنيسة…
بتتذكر يا خيي جدي لي كنا نجبلو الحجار ونساعدو ب عمار كنيستنا..
انطونيو…تطلع معي يا خيي…تطلع نزول صوب الكنيسة…شفت الناس شو كتار…دخلك ليش مجتمعين… بعد ما قرب عيد شفيعي؟…قولك عم يتفقدونا اذا نايمين او عم نمزح معن انو تركناهن وفلينا؟
ايليا يا خيي…سامحني…كان لازم اتركك تكمل المشوار…بس ما قدرت شوف حبك بعيوني….وسمحت لحالي قلك تعا معي..
ما انت ضحكتي وعيوني لي بشوف فين…
ما انت قلبي لي بحب فيه…
كنا نلعب سوا….سبقتني عالدني ب سنة، بس انا سبقتك ب دقيقة عالسما….حتى بالموت ما قدرنا نفارق بعضنا…
شو قولك…رح يفتحلنا الله ايداي؟…متل ما حنا فاتح ايداي ت يغمرنا سوا…
شو قولك الله لي فوق، متل منى الحنونة؟…ما انا بقللا انت يسوع عالارض…
انطونيو…ليك خيي…قولك رح منلاقي ملايكة فوق متل ريتا وماريا…مع مين بدنا نطفي شمعات عيدنا؟
بتتذكر كيف كنا نركض ونتسابق تنجيب هدايا لبعضنا؟…
بس هالمرة نطفت الشمعة و كانت الهدية كبيرة…قدمونا هدية قربان لربنا…وهيدي اعظم هدية…منشكركن يا اهلنا…
يا امي ويا بيي…ما تزعلو…يمكن خلينا دمعتكن تنزل وريتا وماريا يحزنو….مش انتو علمتونا ب ايمانكن وحبكن للرب…انو الله ما بيترك حدا؟..
قولو للناس لي اجو يودعونا….نحنا ما فلينا…نحنا باقيين معكن…
طلعوا عالساحة سمعوا صوتنا…وبالبيت الكتب ناطرة مين يفلفشلا وراقا….شموا ريحة صلاتنا بالكنيسة….سألوا حجار مدرستنا لي عشقت شيطنتنا…تطلعوا بعيون رفقاتنا لي اجو يودعونا…نحنا باقيين بضحكتن…وقولولن يضللوا يتذكرونا….
يا امي وبيي…نحنا ناطرينكن…ما تخافوا…نحنا مع الله لي حبنا كتير تحت…وهلا فوق اكتر بكتير..
الحياة معكن حلوة…بس مع الله احلا…صدقونا…
يا رفقاتنا….ما تتركوا الله لحظة….نحنا هلا معو…قربوا صوبو…صللو…حملوا مسابحكن….نحنا منحبكن….
كنا حابين نكمل المشوار معكن…بس هيك صار….سامحونا بكيناكن….بس غصب عنا…
وهلا اجا وقت نغفا بحضن الله وامنا العدرا ومارالياس حبيب قلبك يا جدي…ما تنسوا نحنا منحبكن…
راحوا وتركونا…بس صوتن متل جرس الكنيسة…رح بيضل يدق…
غريبة يا هالدني…مبارح كانو عم يركضو ويصرخو ويعبو الدني ضحكة وفرح….واليوم سكت الصوت…وما بقيوا غير ذكرى… انطونيو و ايليا… ما رح ننساكن…
تركتو الدمعة بعيون منى والحرقة بقلب حنا…والصدمة ب وجدان ريتا و ماريا… بس انتو فوق…وهيدا ايماننا كلنا…
كلنا ايليا وكلنا انطونيو… باقيين معنا كل الوقت..
نامو ورتاحو يا بيي…نيالكن مع الله…انتو ملايكة….صللولنا… سفرتكن ما راحت عالفاضي…
سفرتكن علامة قيامة…
علامة لحياة وقلوب كل رفقاتكن والناس لي حبوكن…
المسيح قام….حقا قام…
مجنون يسوع…
ب.ج…
نقلاً عن صفحة أبونا بطرس عن الفايسبوك