آخر مشهد – كتب عماد موسى في مجلة “المسيرة” – العدد 1647:
قاعد لوحدك قدامك خارطة لبنان. الشيطان يوزّك قم ترشّح بكسروان. وإنت بفكرك. النيابة من زمان. وما حدا متلك. مكحكح وفهمان. عارف شو بدك. صاحي كنت أو شربان.
الشيطان بعبك. الشيطان بيقلّك إلعب يلا إلعب يلا.
شو مفتكر نفسك؟ محافظ بهبهان.
فركوحين ونص معك. يا بدر الزمان.
يبدو عارف شو بدك. تطلق حالة تغييرية. وتلغي الطائفية. وتمشّي العلمانية وترفع من شأن الإنسانية. وتضرب الفساد بقبضة حديدية.
وتعزز التعليم للمرحلة التكميلية. وتلغي المديونية. وتعمل البلد جنة بيئية. وتفرض كوتا نسائية وولادية.
الشيطان بيقلك.
إشرب يلا، إشرب يلا ولع يلا إلعب يلا إلعب يلا إلعب يلا إشرب يلا ولع يلا
قاعد لوحدك. ضايع ومحتار
إبليس بيقلك إحكي المستشار.
المستشار بيدلك كيف توصل عالبرلمان.
ظبّطلي شكلك. سبّ اللي كان
بمليون دولار. بتشتري كرسي. وما عملت نايب بتعمل مستشار.
وتاني يجي الشيطان يقلك.
ولعت نار، شع الليل. صار نهار.
دواليب ورصاص. سلميّة وقوّاس.
زبالة وحريق. البلد غريق.
يافطة فوق صارت تحت. الحمار ديك. والديك حمار.
حضّر حالك. البلد فلتان.
وأنت ما غيرك متل البهلوان.
خدلك حبل ونط. بين زبوغة وكفررمان
وإلعب يلا. إلعب يلا.
ولعت يلا. ولعِت يلا.
ولعت عالمحاور. رجع الإنضباط.
شفنا إنتشار. ودواليب من مطاط.
تشكلت لجنة. فات كانون بشباط.
سرق بيبو الطابة وكوكو شاط.
شمال يمين. يمين شمالا. إلعب يلا. إلعب يلا.
إنت صاحب مبدأ؟ عيفنا من نظرياتك هلأ
بيّك لاحس الدبس عن قفا النمس.
بيرتشي وبينتشي. على جاط فوارغ ومحشي.
ومتل طاووس الحي بيمشي.
وعمك مدير. محتال وقدير.
والماما عفيفة معاش بلا وظيفة.
مجتمع ولدني وبتنتقد السلطة يا بدر الزمان!
قاعد لوحدك. مشتت وقرفان
بعدك لوحدك؟
الشيطان بيوزّك؟
No قاعد أنا والشباب عم ناخدdrink مع الشيطان. وعم فكر إتحالف مع قوى التغيير والإعتراض بقصقص وفردان.
للإشتراك في “المسيرة” Online:
http://www.almassira.com/subscription/signup/index
from Australia: 0415311113 or: [email protected]