يا نسر رابض فوق ع التّلّي

شفتك متل شي مارد وطلّيت
من سجنك وشهقتلك الطلّي
وع كتر ما بقلب الحبس صلّيت
بعدا حجارو اليوم بتصلّي!
شافوك عالي وكتر ما علّيت
يا نسر رابض فوق ع التّلّي
جابوا الرصاص لحدّ باب البيت
وهنّي يا حسرة بموسم القِّلّي
ولولا حريصا لِ حارسي هل بيت
ما كان طلعت فاضيي السّلّي!

*******
قلّي بأيّا عيد رح هنّيك؟
إنت اللي خلقت شي ألف مرّة!؟
مرّة بأوّل روح فاقت فيك
مرّة بساح المعركة المُرّة
مرّة بصيدا لِ دربها تشريك
مرّة بجبل عم يكسر الجرّة
مرّة بقلب شمال بيناديك
مرّة بقلب مناطق الحرّة
مرّة بدير وصومعة وتبريك
مرّة بْحبس من عتمتو تْبرّا
مرّة بْرَصاص لِ ما رضي يلاقيك
ومرّة بحكم ما أهملو التاريخ:
هِنّي بسجنن… بس إنت… برّا!