ليش ما بتردّوا عليه؟!

الجنرال حَرام كتير زِعلان ومعَصّب لأنّو ما حَدا عَن يجاوبو ويرد عليه!!

إنّو قَلّك يا رئيس الحكومة لا تِنقي بنَفسَك عن عكار وطرابلس وصيدا، وإنت تجَرّأت ومِش بَس ما نِفّذت، كمان ما ردّيت عالجنرال!!! شو هالخطية المُميتة هيدي، الجنرال مش مين ما كان!! إنو مَعقول حدا يفكّر يدَوبِل عالجنرال؟؟!! أو مَنَّك عارِف إنّو مش مظبوط هيدا الشي؟!

لازِم حَدا يرد عالجنرال بَسّ يِعطي أوامرو.

روحو نضَبّوا! روحوا انسِتروا! يِعني روحوا انضبوا وانستروا، شو عن يِلعَب مَعكُن الزَلَمي؟؟

أو ما بَدّي إسمَع بَقا حدا عن يجيب سِيرِت المُقاومة!!! يِعني سَكّروا عالباقي وقطَعوا هالسيرة من أولها!!

وروحوا بلّطو البَحر!!! هيدي بَدكُن تشوفوا كيف تلاقولا حلّة!!

وأكيد ما تنسوا الـ”سكتوا”، ولازم تعَلّقُوا حَلقة بدِينَيكُن.

المُهم تتنفذ أوامر الجنرال وإذا عصيتو عن التنفيذ لازِم ترِدّو عليه وتِعطوه أسباب وَجيهَة بِتبَرّر هيدا الشي!! إي الجنرال مِش مين ما كان!!

نعم الجنرال مِش مين ما كان.

وأكتَر شي كان لافِت للنظر بحلقة الجمعة المُضافة عا المُسلسل الأسبوعي، قَول الجنرال: لم نَعتَد أن نَتَخلّى عَن مسؤولياتنا الوطنية الموكلة إلينا من الشعب اللبناني وتاريخنا شاهد على ذلك!

يا جنرال، رحام حالك عالقليلي من التاريخ، ما إنت بتعرف كتير منيح ونِحنا منَعرف أكتر مِنّك، إنّو تاريخَك حافِل بالهروب وبالتخلّي عن الآخرين وما بيشرّف انّك تجيب سيرتو ولازم تحط كل جهدك تا تنَسّينا ياه.

بسّ يا حسرة، ما حاضرَك كَمان أسوأ من تاريخك وعالأكيد مِتل ما مبَيّن، إنّو مستقبلك رَح يكون أسوأ من تاريخَك وأتعَس من حاضرك.