ضيفي في “قهوتك كيف” – “لو بيرجع فيك الزمن لورا” هذا الأسبوع الأمين العام لحزب القوات اللبنانية إميل مكرزل.
*إميل مكرزل لو بيرجع فيك الزمن لورا، شو كنت بتغير بحياتك؟
كنت بعطي قيمة أكبر للوقت. بعتقد إنو الهاجس الأساسي بحياة الانسان إنو ما بيقدر يعرف قيمة الوقت الا بعد عمر، منشان هيك أول شي بعملوا مع ولادي اليوم إني بعلمهم قيمة الوقت وأهميتو وإنو ما يضيعوا ولا دقيقة إلا ضمن نظرة أو استراتيجية معينة تقدر طورهم بالحياة.
بعتبر الوقت بالغ الأهمية وكل شي بدي اعملو لازم ينعمل متل ما لازم، مني من أنصار منيح وماشي الحال.
*إميل مكرزل لو بيرجع فيك الزمن لورا، شو التصرف يلي مستحيل ترجع تعيدو؟
أصعب سؤال ممكن الانسان يجاوب عليه، لأني عم احكي وانا بنضجي الحالي وعم ناقش واتفلسف ع نضجي السابق.
اليوم بنضجي الحالي بقدر آخد قرارات أفضل، وما بدي اتفلسف على حالي من 20 سنة.
راضي على أدائي، في بس قصة قيمة الوقت يلي ذكرتا سابقاً.
*لو بيرجع فيك الزمن لورا، أي حب مستحيل ترجع تعيشو؟
أنا شخص بهرب قد ما فيي من العواطف، بعتبر العقل هو يلي بيدير الانسان، العواطف بتجي مكون للقرار لكنها منها القرار بحد ذاتو، منشان هيك حبي لعيلتي ثابت وكل ما تبقى بحاول يكون بالعقل.
* لو بيرجع فيك الزمن لورا، شو القرار يلي مستحيل ترجع تاخدو؟
*قرار عائلي:
اضغط على ابني كتير بمسيرتو الرياضية لأنو اعترفلي انو هالضغط كان يزعجه، وبالنهاية انا كنت بي للمرة الأولى وتمرنت فيه.
*قرار اجتماعي:
هون اشكاليتي الدائمة لأنو لو بيظهر اني اجتماعي، عمليا انا مني اجتماعي وبحب كون وحدي اغلبية الوقت.
*قرار سياسي:
كل قراراتي السياسية اخدتها من مصلحة المجموعة الكبرى وعملياً اعود واتخذ نفس القرارات.
*إميل مكرزل، لو رجع فيك الزمن لورا، شو بتغيّر بشخصيتك؟
بخاف غير شي فيي وتكون نتيجة هالشي انو يخف منسوب تحقيق الأهداف يلي عندي، مبسوط بالعيوب يلي فيي وبعتبر متل ما انا قادر انجز وحقق يلي بدي ياه.
*إميل مكرزل، بس ترجع بالزمن لورا، شو الندم الأكبر بحياتك؟
ما بعرف إن كان ندم لأنو الوقت بيحكم الأمور، لكنني لم اقض وقتاً كافياً مع أخي الذي توفي وأمي ومن أحبهم.
عندما يختار الانسان مساراً عليه التضحية بمسار آخر واحاول ان اخلق التوازن.
*لو رجع فيك الزمن لورا، شو اللحظة الأجمل يلي بتجرب تخليها تصير ساعات؟
اجمالاً لحظات السعادة لدي تنتهي على كعبها، لانني اعتبر انها صارت ورانا، انا شخص ممتن بلحظاته السعيدة لكنها تنتهي فوراً وانظر لشيء آخر.
اما الحزن فأفلسفه بشكل آخر، بصير مرتبط بنوستالجيا معينة، بفيلم، بغنية، وبتركوا ع هيدا المستوى وما بسمحلو يأثر على الطاقة اليومية تبعي.
*لو رجع فيك الزمن لورا، كنت بتخلق ذات العداوات؟
بدو ينعمل تصنيف للعداوات لأنو في عداوات ما دخلنا فيها، أوقات ناس بتجي ضدك لشخصك ومش لأنو عملت شي معهم.
أوقات بكون حد كتير لكن هالحدية بهدف التوجه نحو الامام فأي تغيير يتطلب حدية وبعدها يكون هناك بعض الخصومة والعداوات وليس هناك من مسؤول يرضي الجميع.
*أقوى وأضعف نقطة في مسيرتك كأمين عام؟
النقطة الأقوى إني غير متعلق بأي منصب، من أصغر موقع كنت فيه الى الأمانة العامة. عند تغيير أي موقع لا أنهز لا بالشكل فقط، إنما بالمضمون أيضا لا أتأثر ولست عاطفياً تجاه المواقع التي اشغلها لان التعلق يدفع الانسان الى العمل عكس قناعاته ليبقى في منصبه.
هذه النقطة عينها يعتبرها البعض الاضعف لانني لا أستفيد إطلاقا من الموقع الذي اشغله ولا اعيش الموقع.
*ماذا بعد الأمانة العامة؟
على المستوى النضالي أنا دائما وأبدا في القوات اللبنانية، ولا افكر نهائياً بما بعد الأمانة العامة إنما اعمل بإستمرار لأكون حاضراً لتبوء أي موقع ترى القوات اللبنانية ورئيسها ان علي ان اكون فيه، لكنني لا أسعى لأكون بأي موقع.
أسئلة سريعة:
لو بيرجع فيك الزمن لورا
*كنت بتفوت ع معترك الحياة السياسية؟
حتماً لانني بين être وavoir، اختار دائماً être الذي ينص على ان يكون الانسان موجوداً وهذا امر ضروري فلا يمكن ان نكون في الحياة مخلوقات بيولوجية.
*كان بكون عندك ذات الأصحاب؟
ما تغيروا أصحابي لا قبل ولا بعد الأمانة العامة، زاد بعض الاصدقاء بس مش ع حساب الاصدقاء القدامى.
*كنت بتعيد نفس المغامرات؟
يمكن ضرب 10
*كنت بتجيب ولاد على الحياة بلبنان؟
اكيد هيدا من اهم الامور يلي بتدوم بالحياة
*ع فكرة قهوتك كيف؟
بعدها متل العادة ما بتفرق معي لانو كتير صغير الفنجان تتفرق، واذا حلو او مر بينشرب بسرعة.
إقرأ أيضاً: